ఐటీవలికాలంలో ఓటీటీ ప్లాట్‌ఫామ్స్‌కి పెరుగుతున్న ఆదరణ గురించి అందరికి తెలుసు. థియేట‌ర్ల‌లో కంటే ఇంట్లోనే కూర్చుని ఓటీటీలో సినిమాలు చూసేందుకు ప్రేక్ష‌కులు ఎక్కువ ఉత్సాహం చూపిస్తున్నారు. దానికి తగ్గట్టుగానే ర‌క‌ర‌కాల జోనర్స్ సినిమాల‌ను ఆయా సంస్థ‌లు అందుబాటులో ఉంచుతున్నాయి. ముఖ్యంగా క్రైమ్, స‌స్పెన్స్ థ్రిల్ల‌ర్ల‌కు ఎక్కువ ఆద‌ర‌ణ ల‌భిస్తోంది.

తాజాగా అమెజాన్ ప్రైమ్ వీడియోలో స్ట్రీమింగ్ అవుతున్న 'సుడల్: ది వార్టెక్స్' (సుజల్: ది వోర్టెక్స్) వెబ్ సిరీస్ ప్రేక్షకులను విపరీతంగా ఆకట్టుకుంటోంది. తమిళం నుంచి తెలుగు సహా పలు భాషల్లోకి అనువదించిన ఈ సిరీస్ గ్రిప్పింగ్ నెరేషన్‌తో ప్రేక్షకులను కట్టి పడుతోంది.

ఈ కథ సాంబలూరు అనే చిన్న గ్రామంలో ఓ సిమెంట్ ఫ్యాక్టరీలో జరిగిన అగ్ని ప్రమాదంతో మొదలవుతుంది. సరిగ్గా అదే సమయంలో యూనియన్ లీడర్ షణ్ముగం (పార్థిబన్) చిన్న కూతురు నీల కనిపించకుండా పోతుంది. ఈ రెండు సంఘటనల వెనుక ఉన్న నిగూఢ సత్యాలను ఛేదించే అవకాశం ఎదురయ్యే మలుపులే ఈ సిరీస్‌కి ఆయువుపట్టు.

ముఖ్యంగా ఈ సిరీస్‌లో నటీనటుల పెర్ఫార్మెన్స్ హైలైట్ అని చెప్పాలి. ఐశ్వర్య రాజేష్ తన సహజ సిద్ధమైన నటనతో ఆకట్టుకోగా, చాలా కాలం తర్వాత పోలీస్ ఆఫీసర్ పాత్రలో కనిపించిన శ్రియారెడ్డి పవర్ ఫుల్ నటనను కనబరిచారు. కథిర్ మరియు పార్థిబన్ తమ పాత్రల్లో ఒదిగిపోయారు. 'విక్రమ్ వేద' వంటి సంచలన చిత్ర కథను అందించిన పుష్కర్-గాయత్రి ద్వయం ఈ సిరీస్‌ను క్రియేట్ చేయడం విశేషం.

సాంకేతికంగా కూడా ఈ సిరీస్ ఉన్నత స్థాయిలో ఉంది. సామ్ సీఎస్ అందించిన సంగీతం నేపథ్య సన్నివేశాలను మరింత ఎలివేట్ చేసింది. కేవలం క్రైమ్ కాకుండా సామాజిక అంశాలు, ముఖ్యంగా చిన్న పిల్లలపై జరిగే అఘాయిత్యాలను మరియు వారి తాలూకు మానసిక శక్తిని ఈ సిరీస్‌లో చాలా లోతుగా చర్చించారు.